हुनेवाला पतिलाई ४०० फिटको खाल्डोमा धकेल्ने सिया र उनका प्रेमीले स्वीकारे अपराध

भारत : भारत पुणेको लोहागढ किल्लाबाट ४०० फिट गहिरो खाडलमा आफ्ना हुनेवाला पति केतन अग्रवाललाई धकेलेको आरोपमा उनकी हुनेवाला दुलही सिया गोयलले आफ्नो अपराध स्वीकार गरेकी छिन् । सियाका प्रेमी चेतन चौधरीले पनि हत्याकाण्डमा आफू संलग्न रहेको स्वीकार गरेका छन् । स्रोतहरूका अनुसार प्रहरी सोधपुछमा दुवैले सिया केतनसँग विवाह गर्न चाहँदैनथिन्, त्यसैले उनले केतनको हत्या गर्ने योजना बनाएकी थिइन् ।

सिया र चेतन दुवै केतनलाई बाटोबाट हटाउन चाहन्थे । केतन एक ठूला व्यवसायीका छोरा थिए र उनको उमेर मात्र २६ वर्ष थियो । उनका मामा नरेन्द्र मित्तलले टाढाको नातामा नै सिया गोयलसँग उनको विवाह तय गरिदिएका थिए । केतन सियासँग निकै खुशी थिए । उनका धेरै भिडियोहरू सार्वजनिक भएका छन्, जसमा उनी जन्मदिनको उत्सवमा निकै खुशी देखिन्छन् । मगनीपछि सिया र केतन सँगै घुम्न जान्थे । यसै क्रममा उनीहरू पुणेको लोहागढ किल्लामा घुम्न गएका थिए, जहाँ सियाले केतनलाई ४०० फिट माथिबाट खाडलमा धकेलेकी थिइन् । सुरुमा यो घटना दुर्घटना जस्तो देखिएको थियो, तर पछि प्रहरी अनुसन्धानमा यो हत्या भएको खुलेको हो ।