दुई कोठामा पाँच कक्षा संचालन, फेरियो इतिहास

वीरगन्ज । साना दुईवटा कोठा । त्यही दुईवटा कोठामा पाँचवटा कक्षा संचालन । विद्यालयको धरातलीय यथार्थ सम्झँदा जसलाई पनि मन खिन्न हुन्थ्यो । पर्साको ठोरी गाउँपालिका वडा नम्बर ३ को शिकारीबासमा २०३६ सालमा स्थापित श्री नेपाल राष्ट्रिय प्राथमिक विद्यालयको अवस्था यस्तै चिन्ताजनक थियो ।

पर्सा राष्ट्रिय निकुञ्ज भित्रको जंगलका बीचमा अवस्थित गाउँका बालबालिकाले अध्ययन गर्ने सो विद्यालयका सामान्य २ कोठा पनि जंगली हात्तीले भत्काइ दिएपछि त्यहाँका बालबालिकाको शिक्षा लिन पाउने आधारको सपना ढलेको थियो । हिउँद भरी कक्षा कोठाको पढाई अनुभूति गर्न नपाउँदै हिउँद सकिने शिकारीबासका बालबालिकाको त्यो दिन बल्ल इतिहास बनेको छ ।