इन्धन मूल्य स्थिर, निगमलाई मासिक ६२ करोड घाटा

काठमाडौँ। नेपाल आयल निगमले अन्तर्राष्ट्रिय बजारमा पेट्रोलियम पदार्थको मूल्य निरन्तर बढे पनि खुद्रा मूल्य यथावत राख्ने निर्णय गरेको छ।

निगमका अनुसार मध्यपूर्वमा जारी द्वन्द्वका कारण अन्तर्राष्ट्रिय बजारमा पेट्रोलियम पदार्थको मूल्यमा वृद्धि भइरहेको छ। सोहीअनुसार भारतीय आयल कर्पोरेसनबाट प्राप्त नयाँ खरिद मूल्यका आधारमा स्वचालित मूल्य प्रणालीअनुसार समायोजन गर्नुपर्ने भए पनि उपभोक्ताको हितलाई ध्यानमा राख्दै मूल्य नबढाउने निर्णय गरिएको निगमका प्रवक्ता मनोजकुमार ठाकुरले विज्ञप्तिमार्फत जनाएका हुन्।