पौडी खेल्ने क्रममा फेवातालमा डुबेर युवकको मृत्यु

फेवातालमा पौडी खेल्ने क्रममा डुबेका पोखराका एकजना युवाको ज्यान गएको छ। पौडी खेल्ने क्रममा मंगलबार बेलुकी बेपत्ता भएका १९ वर्षीय ती युवकलाई सशस्त्र प्रहरीको विपद् व्यवस्थापन टोलीले फेवातालबाट उद्धार गरेको थियो। उद्धारलगत्तै अस्पताल पुर्याइएको थियो। तर, चिकित्सकले मृत घोषणा गरेको प्रहरीले बताएको छ।

प्रहरीका अनुसार कास्की पोखरा महानगरपालिका– १५ रामबजार बस्ने वर्ष १९ का अमर थापा फेवातालमा पौडी खेल्ने क्रममा डुबेर बेपत्ता भएका थिए। तालमा डुबेको खबर पाउनासाथ सशस्त्र प्रहरीको कालिका गणको गोताखोरसहितको विपद् व्यवस्थापन टोली खोजी र उद्धारका लागि खटिएको थियो। बेलुकी ८ बजे उद्धारका लागि घटनास्थल खटिएको प्रहरीले राती ९ बजेर १० मिनेटमा तालको करिब २५ फिट गहिराईबाट ती युवकलाई अचेत अवस्थामा फेला पारेको थियो।