नेपालमा रेबिज खोप कति छ मौज्दात, कहिलेसम्म पुग्छ?

काठमाडौं – देशका विभिन्न जिल्लामा रेबिज खोप अभाव भएको गुनासो बढिरहेका बेला स्वास्थ्य सेवा विभागले हाल मौज्दात रहेको खोपले आगामी साउनसम्म धान्न सक्ने दाबी गरेको छ। विभागका अनुसार देशभर हाल ११ हजारभन्दा बढी भाइल रेबिज खोप मौज्दात रहेको छ भने थप ४ हजार ५ सय भाइल खोप आगामी शनिबारसम्म नेपाल आइपुग्ने तयारीमा छ।

सरकारले हरेक वर्ष करिब ३ लाखभन्दा बढी रेबिज खोप खरिद गर्दै आएको भए पनि यस वर्ष खरिद प्रक्रियामा ढिलाइ हुँदा केही स्वास्थ्य संस्थामा खोप अभाव देखिएको हो। पछिल्लो समय देशभरका विभिन्न जिल्लाबाट रेबिज खोप नपाएको गुनासो आउन थालेपछि विभागले मौज्दात र खरिद प्रक्रियाका विषयमा स्वास्थ्य तथा खाद्य स्वच्छता मन्त्रालयमा जानकारी अद्यावधिक गराएको छ।