दृष्टिविहीन छात्रावासका लागि कामना सेवा विकास बैंकले दियो आवश्यक सामग्री

कामना सेवा विकास बैंकले संस्थागत सामाजिक उत्तरदायित्व (सीएसआर) कार्यक्रमअन्तर्गत झापाको बिर्तामोड–९ स्थित श्री दुर्गा माध्यमिक विद्यालयलाई कुलर तथा ब्रेल पेपर सहयोग गरेको छ ।

बैंकको शाखा कार्यालय बिर्तामोडमार्फत विद्यालयलाई उक्त सामग्री हस्तान्तरण गरिएको हो । बैंकका कोशी प्रदेश प्रमुख खिमलाल भुसालले विद्यालयका प्रधानाध्यापक लक्ष्मण सापकोटालाई कुलर तथा ब्रेल पेपर हस्तान्तरण गरेका हुन् ।

दृष्टिविहीन छात्रावासमा बस्ने विद्यार्थीहरूको आवश्यकता सम्बोधन गर्ने उद्देश्यले सहयोग प्रदान गरिएको बैंकले जनाएको छ । हस्तान्तरण गरिएको कुलरले गर्मीयाममा छात्रावासभित्रको तापक्रम सहज बनाउन मद्दत पुग्ने तथा विद्यार्थीलाई आरामदायी वातावरणमा अध्ययन गर्न सहयोग पुग्ने अपेक्षा गरिएको छ ।

त्यस्तै, ब्रेल पेपर दृष्टिविहीन विद्यार्थीहरूको पठनपाठनका लागि अत्यावश्यक शैक्षिक सामग्री भएकाले यसले उनीहरूको सिकाइ प्रक्रियालाई थप प्रभावकारी र गुणस्तरीय बनाउन योगदान पुग्ने विश्वास गरिएको छ ।

कार्यक्रममा विद्यालयका प्रधानाध्यापक सापकोटाले बैंकप्रति आभार व्यक्त गर्दै प्राप्त सहयोगले दृष्टिविहीन विद्यार्थीहरूको अध्ययन तथा छात्रावास व्यवस्थापनमा महत्वपूर्ण सहयोग पुग्ने बताए ।

सो अवसरमा बैंकका कोशी प्रदेश प्रमुख भुसालले शिक्षा क्षेत्रको विकास र समुदायका आवश्यकतालाई सम्बोधन गर्ने उद्देश्यले बैंकले विभिन्न सामाजिक उत्तरदायित्वका कार्यक्रम सञ्चालन गर्दै आएको उल्लेख गरे । उनले आगामी दिनमा पनि यस्ता कार्यक्रमलाई निरन्तरता दिइने प्रतिबद्धता व्यक्त गरे ।

प्रकाशित मिति: बुधबार, असार १०, २०८३

१९:३९