सामाजिक सञ्जालका ‘चमत्कारी उपचार’को विज्ञापनले मानव स्वास्थ्यमा असर: रोगसँगै औषधिको जथाभावी प्रयोगले बढायो जोखिम

बदलिँदो खानपान, शारीरिक गतिविधिको कमी, बढ्दो तनाव र अनियमित जीवनशैलीका कारण मधुमेह, फ्याटी लिभर, उच्च कोलेस्ट्रोल र उच्च रक्तचापजस्ता नसर्ने रोग नेपाली समाजमा पनि आम बन्दै गएका छन् । यीमध्ये कतिपय रोग लामो समयसम्म कुनै स्पष्ट लक्षण नदेखाई शरीरमा असर गरिरहने भएकाले नियमित स्वास्थ्य परीक्षण र जीवनशैलीमा सुधार आवश्यक हुन्छ ।

तर, रोगको जोखिम बढिरहेका बेला सामाजिक सञ्जालमा भने ‘केही दिनमै निको’, ‘औषधिबिनै उपचार’, ‘जडिबुटीबाट मधुमेहको अन्त्य’ वा ‘लिभर सफा गर्ने चमत्कारी औषधि’जस्ता दाबी भएका विज्ञापन र भिडियोहरू फैलिने गरेका छन् । यस्ता प्रचारका आधारमा चिकित्सकको सल्लाहबिनै औषधि वा सप्लिमेन्ट सेवन गर्दा रोग नियन्त्रणमा आउनुको सट्टा थप स्वास्थ्य समस्या निम्तिन सक्ने चिकित्सकहरू बताउँछन् ।