दाङको राप्ती गाउँपालिकाले ल्यायो ७५ करोडको बजेट

देउखुरी । लुम्बिनी प्रदेशको राजधानी रहेको दाङको राप्ती गाउँपालिकाले आर्थिक वर्ष २०८३/०८४ का लागि ७५ करोड ४ लाख ९६ हजार रुपैयाँ बराबरको बजेट सार्वजनिक गरेको छ ।

गाउँपालिकाको दोस्रो गाउँसभाको नवौँ अधिवेशनमा उपाध्यक्ष कमलापति चौधरीले उक्त बजेट प्रस्तुत गरेका हुन् । प्रस्तुत बजेटअनुसार चालू खर्चतर्फ ५५ करोड ३५ लाख १० हजार रुपैयाँ तथा पुँजीगत खर्चतर्फ १९ करोड ६९ लाख ८६ हजार रुपैयाँ विनियोजन गरिएको छ। बजेटले शिक्षा, स्वास्थ्य र पूर्वाधार विकासलाई मुख्य प्राथमिकतामा राखेको गाउँपालिकाले जनाएको छ ।

क्षेत्रगत रूपमा हेर्दा शिक्षा, युवा तथा खेलकुदका लागि ८ करोड ९ लाख २० हजार रुपैयाँ, स्वास्थ्यतर्फ ४ करोड २ लाख ९६ हजार रुपैयाँ, कृषि क्षेत्रमा ५२ लाख ६० हजार रुपैयाँ, पशुपन्छी तथा मत्स्य विकासका लागि ५९ लाख ७० हजार रुपैयाँ तथा महिला, बालबालिका तथा ज्येष्ठ नागरिकका लागि ५१ लाख ५० हजार रुपैयाँ बजेट विनियोजन गरिएको छ ।

त्यस्तै संस्थागत सुशासनका लागि ५४ लाख रुपैयाँ, खानेपानी तथा फोहोरमैला व्यवस्थापनका लागि १ करोड ८३ लाख रुपैयाँ, पर्यटन तथा सहकारी प्रवर्द्धनका लागि ९ लाख ५० हजार रुपैयाँ, श्रम, रोजगार तथा उद्यमशीलता विकासका लागि २७ लाख ९७ हजार रुपैयाँ छुट्याइएको छ ।

पूर्वाधार विकासलाई प्राथमिकता दिँदै गाउँपालिकाले ६ करोड ८१ लाख ३८ हजार रुपैयाँ विनियोजन गरेको छ। यसैगरी वन, वातावरण तथा विपद् व्यवस्थापनका लागि २८ लाख ९५ हजार रुपैयाँ, सूचना प्रविधिका लागि ३९ लाख रुपैयाँ, न्यायिक समितिका लागि ३० लाख ५० हजार रुपैयाँ, राजस्व व्यवस्थापनका लागि ३८ लाख रुपैयाँ तथा भूमि व्यवस्थापनका लागि १५ लाख रुपैयाँ बजेट प्रस्ताव गरिएको छ।

गाउँपालिकाका सम्पूर्ण वडाका लागि ६ करोड ६९ लाख रुपैयाँ, संघ तथा प्रदेशका सशर्त कार्यक्रमका लागि ३० करोड १९ लाख रुपैयाँ, विशेष कार्यक्रमका लागि ७० लाख रुपैयाँ तथा समपूरक कार्यक्रमका लागि १ करोड ४० लाख रुपैयाँ बजेट विनियोजन गरिएको छ।

गत आर्थिक वर्ष २०८२/०८३ मा गाउँपालिकाले ६५ करोड २७ लाख २ हजार ९ सय रुपैयाँ बराबरको बजेट ल्याएको थियो। चालु आर्थिक वर्षका लागि प्रस्तुत बजेट अघिल्लो वर्षको तुलनामा करिब ९ करोड ७७ लाख रुपैयाँले बढी रहेको छ।

गाउँपालिकाले प्रस्तुत गरेको बजेटले शिक्षा, स्वास्थ्य सेवा विस्तार, पूर्वाधार विकास तथा जनजीविकासँग प्रत्यक्ष सरोकार राख्ने क्षेत्रलाई प्राथमिकतामा राख्दै समृद्ध र आत्मनिर्भर राप्ती निर्माणको लक्ष्य लिएको जनाएको छ।