पदाधिकारीका लागि आज चुनावी प्रतिस्पर्धा, यस्तो छ ‘हेभिवेट’ उम्मेदवारहरूको दाबेदारी

चितवन । चितवनमा जारी राष्ट्रिय स्वतन्त्र पार्टी (रास्वपा) को पहिलो ऐतिहासिक महाधिवेशन अहिले नेतृत्व चयनको निर्णायक र रोचक मोडमा आइपुगेको छ । केन्द्रीय सदस्यहरूको निर्वाचनको प्रारम्भिक नतिजा सार्वजनिक भएसँगै नेतृत्वको दोस्रो तह अर्थात् पदाधिकारीका लागि नेताहरूबिचको रस्साकस्सी निकै तातिएको छ । निर्वाचन आयोगले प्रवासतर्फको मत समेत जोडेर अन्तिम परिणाम सार्वजनिक गर्ने तयारी गरिरहँदा पदाधिकारीका आकांक्षीहरूले पनि आ–आफ्नो दाबेदारीलाई घनिभूत बनाएका छन् ।

पार्टीको विधानमा कूल १९ पदाधिकारी रहने व्यवस्था भए पनि यसपटक ६ वटा पदका लागि मात्रै प्रत्यक्ष निर्वाचन हुने भएको छ । सभापतिमा रवि लामिछाने निर्विरोध निर्वाचित भइसकेका छन् भने वरिष्ठ नेताका रूपमा बालेन शाह रहने निश्चित छ । बाँकी रहेका पदहरूमध्ये एक खुला उपसभापति, एक महिला उपसभापति, एक खुला महामन्त्री, दुई खुला सह–महामन्त्री र एक महिला सह–महामन्त्री पदका लागि मात्रै चुनावी प्रतिस्पर्धा हुन लागेको हो । अन्य पदाधिकारीका पदहरू भने विधानको व्यवस्थाअनुसार समावेशी सिद्धान्तका आधारमा पछि मनोनीत गरिनेछन् ।