अमेरिकी रक्षा मन्त्रालयविरुद्ध अलिबाबाले हाल्यो मुद्दा, के हो विवाद ?

काठमाडौं । चिनियाँ कम्पनी अलिबाबाले अमेरिकी रक्षा मन्त्रालय (पेन्टागन) विरुद्ध मुद्दा दायर गरेको छ ।

समाचार एजेन्सी एएफपीका अनुसार चिनियाँ सेनासँग जोडिएको फर्मको रूपमा वर्गीकरण गर्ने पेन्टागनको निर्णय मनपरी र मनगढन्ते भन्दै मुद्दा दायर गरेको कम्पनीले जनाएको छ ।

यो ब्ल्याकलिस्टमा अलिबाबाका साथै बाइडु र इलेक्ट्रिक सवारीसाधन निर्माता कम्पनी बीवाईडीसहित ८० वटा कम्पनीहरूलाई समावेश गरिएको छ ।

यो नियमअन्तर्गत, आगामी ३० जुनदेखि पेन्टागनले यी सूचीकृत कम्पनीहरू वा उनीहरूका सहायक कम्पनीहरूसँग नयाँ सम्झौता गर्न पाउने छैनन् ।

अलिबाबाले आफू सार्वजनिक रूपमा कारोबार गर्ने एउटा ई–कमर्स र क्लाउड–सेवा प्रदायक कम्पनी भएको र जसका सेयरधनीहरूमा जेपी मोर्गन, सिटीग्रुप र ब्ल्याकरकजस्ता प्रमुख अमेरिकी वित्तीय संस्थाहरू समेत सामेल रहेको मुद्दामा तर्क गरेको छ ।

यो ब्ल्याकलिस्टको जवाफमा चीनले पनि सोमबार प्रतिशोधात्मक कारबाही गर्दै रक्षा र दुर्लभ खनिजसँग जोडिएका १० वटा अमेरिकी कम्पनीहरूमाथि निर्यात नियन्त्रण लगाएको छ ।

#अमेरिका

#अलिबाबा