विश्व वातावरण दिवसमा सांग्रिला डेभलपमेन्ट बैंकको चौथो साइकल र्याली सम्पन्न

काठमाडौं । विश्व वातावरण दिवसको अवसरमा सांग्रिला डेभलपमेन्ट बैंक लिमिटेडले ‘इन्धन जोगाऔँ, पृथ्वी बचाऔँ’ भन्ने मूल नाराका साथ चौथो संस्करणको साइकल र्याली आयोजना गरेको छ । डेभलपमेन्ट बैंकर्स एसोसिएसन नेपालको सहकार्यमा शनिबार सम्पन्न उक्त र्यालीमा ४०० भन्दा बढी सहभागीले उत्साहपूर्ण साइकल यात्रा गरे ।

बैंकको केन्द्रीय कार्यालय बालुवाटार प्राङ्गणबाट प्रमुख कार्यकारी अधिकृत सुयोग श्रेष्ठले र्यालीको औपचारिक शुभारम्भ गरेका थिए । ‘राइड फर अ ग्रिनर टुमरो’ (हरित भविष्यका लागि साइकल यात्रा) को अभियानात्मक नारासहित सुरु भएको र्याली गैरीधारा, नारायण चौर, नागपोखरी, नारायणहिटी, दरबार मार्ग, भद्रकाली मन्दिर, शहीद गेट, त्रिपुरेश्वर, सुन्धारा, जमल हुँदै पुनः दरबारमार्ग, कृष्ण पाउरोटी, सिटी सेन्टर, ज्ञानेश्वर, जर्मन एम्बेसी र सानो गौचरण पुगेर सम्पन्न भएको थियो । करिब १४ किलोमिटर लामो उक्त मार्गमा सहभागीको सुरक्षाका लागि ट्राफिक प्रहरी, स्वयंसेवक तथा मेडिकल टोलीको समुचित व्यवस्था गरिएको थियो ।