बाँके र दाङको अधुरो हुलाकी सडक बनाउन ५.५० अर्बको ठेक्का

बाँके र दाङको बिच खण्डमा अधुरो रहेको हुलाकी सडक निर्माण अगाडि बढाउन ठेक्का खोलिएको छ। हुलाकी राजमार्ग निर्देशनालयले बाँके र दाङको अधुरा क्षेत्रलाई अलग गरी पाँच अर्ब ६० करोड रुपैयाँ बराबरको ठेक्का खोलेको हो। हुलाकी सडक निर्देशनालय आयोजना कार्यालय नेपालगन्जका प्रमुख लीलाबहादुर भण्डारीका अनुसार बाँकेको राप्तीसोनारी– ३ नारायणपुरदेखि दाङको सीमा क्षेत्र हाटबाससम्मको ३६ किलोमिटर सडक निर्माण गर्न तीन अर्ब २० करोड र उक्त खण्डको विभिन्न खोलामा चारवटा ठुला पुल निर्माण गर्न ५० करोड रुपैयाँको ठेक्का खोलिएको छ।

यस्तै दाङको हाटबासदेखि राजपुर गाउँपालिकाको गंगदीसम्म अधुरो रहेको करिब २२ किलोमिटर सडक निर्माण गर्न एक अर्ब ४० करोड र सो क्षेत्रमा ६ वटा पुल निर्माण गर्न ५० करोड रुपैयाँ बराबरको ठेक्का खोलिएको आयोजना प्रमुख भण्डारीले जानकारी दिए। ‘बाँके र दाङको दुई खण्डमा बहुबर्सेअन्तर्गतको ठेक्का खोलिएको छ’, उनले नागरिकसँग भने, ‘ठेक्का नै खुलिसकेपछि बाँके र दाङको बिचमा हुलाकी सडक बन्ने निश्चित भयो।’