‘मुर्रा राँगा’ को वीर्यबाट भैँसीको नश्ल सुधार गरिँदै

काठमाडौँ । नेपालमा भैँसीको नश्ल सुधार तथा दुध उत्पादन वृद्धि गर्ने उद्देश्यले भारतबाट प्राप्त १५ वटा मुर्रा राँगाबाट ४८ हजार ८५६ डोज वीर्य सङ्कलन गरी किसानलाई वितरण गरिएको छ। मूल रूपमा भारतको पञ्जाब र हरियाणा राज्यमा उत्पत्ति भएको मुर्रा उच्च दूध उत्पादनका लागि प्रख्यात र व्यावसायिक रूपमा निकै लाभदायक मानिने भैँसीको उन्नत जात हो।

पशु सेवा विभागका सूचना अधिकारी डा. इन्दिरा शर्माका अनुसार भारत सरकारले वि.सं. २०८० मङ्सिरमा उपहार स्वरूप उपलब्ध गराएका यी उच्च प्रजनन क्षमताका राँगाहरूबाट हालसम्म कूल १ लाख ३० हजार ४२४ डोज वीर्य जम्मा गरिएको छ।