शिक्षिकाले विद्यार्थी पिटेको भाइरल भिडिओपछि बाल अधिकार परिषद्‌ भन्छः यस्तोमा १०८९ मा कल गर्नु

काठमाडौं । काठमाडौँको बौद्ध, सिमलटारमा रहेको खवालुङ गुम्बा स्कुलमा एक शिक्षिकाले सानो बालकलाई निर्मम रूपमा कुटपिट गरेको भिडिओ सामाजिक सञ्जालमा भाइरल भएपछि राष्ट्रिय बाल अधिकार परिषद्ले आफ्नो गम्भीर ध्यानाकर्षण भएको जनाएको छ । परिषद्ले यस्ता हिंसाजन्य कार्य विरुद्ध बाल हेल्पलाइनको १०८९ नम्बरमा कल गरी उजुरी गर्न आग्रह गरेको छ ।

सामाजिक सञ्जालमा सार्वजनिक भएको ३२ सेकेन्ड लामो भिडिओमा शिक्षिका सोना रानाले एक विद्यार्थीलाई लाठीले हत्केलामा पटक-पटक हानेको देखिन्छ । लाठी प्रहारबाट विद्यार्थी पीडाले छटपटाउँदै लामो-लामो सास फेरिरहेको र अन्य विद्यार्थीहरू त्रसित अवस्थामा रहेको भिडिओमा प्रस्ट देखिन्छ । शिक्षिकाले विद्यार्थीलाई 'तिमीहरूले मलाई हेपेको होइन ? अब म तँलाई एक चान्स पनि दिन्नँ' भन्दै आक्रोशित मुद्रामा पिटेकी छिन् ।