दोहोरो पीडामा बन्दुरामः ‘छोरा रसुवामा बेपत्ता, मिर्गौला पीडित श्रीमती उपचार नपाएर थला’

रसुवाको लाङटाङ जलविद्युत् आयोजनामा कार्यरत शुक्लाफाँटा नगरपालिका–३ जोनापुरका अभिषेक डगौराले गत भदौ १० गते बिहान ८ः३० बजे आमा सुनितालाई उपचारका लागि चिन्ता नलिन ढाडस दिँदै हुनुहुन्थ्यो ।

आमा–छोराको संवादको निष्कर्ष थियो भारतको राजधानी नयाँ दिल्ली जाने । उतै काम र उपचार गर्ने । “आमा एक÷दुई दिनमा घर आउँछु । चिन्ता नलिनू । दिल्ली गएर हजुरको उपचार राम्रोसँग गरौँला,” छोरासँगको अन्तिम संवाद सम्झँदै सुनिता डगौराले भन्नुभयो, “गरिबीले छोरा घरमा कहिल्यै बसेन । मजदुरीका लागि यताउता नै भयो । उसको कमाइले हाम्रो घरको चुल्हो बल्थ्यो । अब त घरमा दिउँसै अँध्यारो भयो ।”