चेकड्याम नबन्दा फेवाताल पुरिने जोखिम

पोखराको फिर्केखोलामा बनेका संरचना हटाउने अभियान सम्पन्न भएको छ। फिर्केखोला खोजी अभियानअन्तर्गत खोलाघरमा बनेका तथा खोलाघरको मापदण्ड मिचेर बनाइएका संरचना हटाउन चलाइएको अभियान एक हप्ता लगाएर सकिएको हो । जेठ १० बाट सुरु भएको अभियानअन्तर्गत फिर्केखोला खोलाघरमा बनेका एक सय ६० वटै संरचना भत्काइएको पोखरा महानगरपालिकाले जनाएको छ। अतिक्रमणको चपेटामा परेको करिब आठ किलोमिटरको फिर्केखोलामा नापजाँचपश्चात् गाडिएका पाँच सय ८८ वटा सीमास्तम्भभित्र परेका सबै संरचना भत्काइएको दाबी महानगरको छ।

महानगरले सबै संरचना भत्काएको बताए पनि स्थायी संरचना भने आंशिक रूपमा मात्रै भत्काएको पाइएको छ । महानगरले गत वर्ष बनाएको प्रतिवेदनमा ४५ वटा स्थायी र एक सय १५ वटा अस्थायी प्रकृतिका संरचना निर्माण भएको उल्लेख छ। त्यसमध्ये अस्थायी संरचना पूर्णरूपमा भत्काएको पाइएको छ भने स्थायी संरचनामध्ये अधिकांश आंशिक मात्रै भत्काएको छ। खोलाघरमै बनेका १८ वटा र मापदण्ड मिचेर बनाइएका ३५ वटा स्थायी संरचनामा महानगरले डोजर चलाए पनि पूर्णरूपमा नभत्काई छाडेको छ। कतिपय घरधनी आफैंले भत्काउने शर्तमा छाडिएको छ भने कतिपय भौगोलिक जटिलताका कारण त्यसै छाडेको पाइएको छ।