विश्वकप २०२६: ब्राजिलको सहज जित, स्कटल्याण्डको भाग्य अझै अन्योलमा

सन् २०२६ को फिफा विश्वकप अन्तर्गत समूह 'सी' को अन्तिम खेलमा दक्षिण अमेरिकी पावरहाउस ब्राजिलले स्कटल्याण्डलाई ३–० को फराकिलो अन्तरले पराजित गरेको छ।

मियामी स्टेडियममा बिहीबार बिहान सम्पन्न खेलमा ब्राजिलका लागि भिनिसियस जुनियरले दुई गोल गरे भने म्याथ्युज कुन्हाले एक गोल थपे।

खेलको सुरुवातदेखि नै हावी भएको ब्राजिलले सातौँ मिनेटमा सुरुवाती अग्रता लिएको थियो। रायनको उत्कृष्ट पासलाई सदुपयोग गर्दै भिनिसियस जुनियरले टिमका लागि पहिलो गोल गरे। खेलको बीचमा भिनिसियसले गरेको अर्को गोललाई भने भीएआरले मान्यता दिएन। स्कटल्याण्डका डिफेन्डर हेन्ड्रीलाई लडाएको भन्दै रेफ्रीले उक्त गोललाई रद्द गरिदिएका थिए।

यद्यपि, पहिलो हाफको इन्जुरी समयमा भिनिसियस जुनियरले ब्रुनो गुइमारेसको क्रसलाई हेडमार्फत गोलमा परिणत गर्दै ब्राजिलको अग्रता २–० मा पुर्याए। दोस्रो हाफमा पनि ब्राजिलले आफ्नो लयलाई कायम राख्यो। ६० औँ मिनेटमा ब्रुनो गुइमारेसकै पासमा म्याथ्युज कुन्हाले तेस्रो गोल गरेपछि ब्राजिलको जित सुनिश्चित भएको थियो।

स्कटल्याण्डले खेलको अन्तिम समयमा केही प्रयास गरे पनि सफल हुन सकेन। स्कट म्याकटोमिनेको उत्कृष्ट प्रहारलाई ब्राजिलका गोलकिपर एलिसन बेकरले बचाउ गरे। स्कटल्याण्डका प्रशिक्षकले खेलको अन्त्यतिर चे एडम्स र फिन्डले कर्टिसलाई मैदान पठाए पनि उनीहरूले खेलको नतिजामा कुनै प्रभाव पार्न सकेनन्।

यो जितसँगै ब्राजिल समूह 'सी' को विजेता बन्दै नकआउट चरणमा प्रवेश गरेको छ। अर्कोतर्फ, पराजित स्कटल्याण्ड ३ अंकका साथ समूहको तेस्रो स्थानमा छ। नयाँ विश्वकप संरचना अनुसार १२ वटा समूहमध्ये उत्कृष्ट ८ वटा तेस्रो हुने टोलीले नकआउट चरणमा स्थान बनाउने प्रावधान छ।

हाल स्कटल्याण्ड छैटौँ उत्कृष्ट तेस्रो टोलीको रूपमा रहेकाले उसको अन्तिम ३२ मा पुग्ने सम्भावना अझै बाँकी छ, तर त्यसका लागि अन्य समूहका नतिजाहरूमा भर पर्नुपर्नेछ।

यसै समूहको अर्को खेलमा मोरक्कोले हाइटीलाई ४–२ ले पराजित गरेको छ।