उपत्यकाको फोहोरमाथि आन्दोलन

काठमाडौं । बन्चरेडाँडा ल्यान्डफिल साइट प्रभावित क्षेत्र सरोकार समितिले आइतबार पत्रकार सम्मेलन गरेर असोज २१ गतेदेखि उपत्यकाको फोहोर अनिश्चित्कालीन बन्द गर्ने भनेको छ । यसअघि सो समितिले साउन ३१ गते पत्रकार सम्मेलन गरी असोज १ गतेदेखि सधैंका लागि फोहोर विसर्जन बन्द गर्ने चेतावनी दिएको थियो ।

प्रधानमन्त्री पुष्पकमल दाहाल ‘प्रचण्ड’ले अमेरिका र चीन भ्रमणबाट फर्केपछि मात्र समस्या समाधान हुने आश्वासन दिएपछि २० दिनका लागि समितिले स्थगित गरेको जनाएको हो । समितिका संयोजक श्रीराम ढुंगानाले प्रधानमन्त्री स्वयंले विशेष आग्रह गरेको कारण केही दिनका लागि आन्दोलन स्थगित गरिएको बताउनुभएको छ । समितिले भदौ २६ गते प्रधानमन्त्री कार्यालयलाई आन्दोलन गर्ने जानकारी दिँदै ज्ञापनपत्र पठाएपछि प्रधानमन्त्री प्रचण्डले भ्रमणबाट फर्केपछि समस्या समाधान गर्ने आश्वासन दिनुभएको थियो । संयोजक ढुंगानाले प्रधानमन्त्री तथा मन्त्रिपरिषद्को कार्यालय खानेपानी तथा शहरी विकास शाखा र शहरी विकास मन्त्रालयले छुट्टाछुट्टै पत्र पठाएर माग पूरा गर्न यथासम्भव प्रयास गर्ने जनाएको जानकारी दिँदै भन्नुभयो– ‘दुई निकायले पत्र काटेको विषयभन्दा पनि प्रधानमन्त्री कार्यालय र मुख्य सचिवको आग्रहको कारण २० दिनको लागि स्थगित गरेका हौं ।’