फेवाताल संरक्षणमा इच्छाशक्ति कति?

पोखराको अस्तित्व फेवातालसँग जोडिएको छ। अझ भनौं फेवाताल छ र त पोखरा छ भन्दा पनि फरक नपर्ला। अनि फेवाताल छ र त पोखराको पर्यटन थियो, छ र रहनेछ। फेवाताल नै नरहने हो भने पोखराको पर्यटन के होला? पक्कै पनि अहिले जस्तो छ त्यस्तो नरहला भनेर हामी सजिलै भन्न सक्छौं। यस अर्थमा फेवाताल पोखराको पहिचान हो र यो पर्यटनको प्रमुख आधार पनि हो तर यही फेवाताल संरक्षण नहुँदा पोखराको पर्यटनको भविष्यमाथि बारम्बार प्रश्न उठ्ने गरेको छ। फेवाताल संरक्षण प्रयास नभएको भने होइन, तर जुन गतिमा हुनुपर्ने हो त्यो गति एकदमै धिमा छ।

फेवाताल संरक्षणका लागि तीन तहको सरकारले गरिरहेको प्रयास धिमा हुँदा सरोकारवालासँगै समग्र पोखरेली जनता भने चिन्तित छन्। संरक्षणका लागि अध्ययन, प्रतिवेदन, मापदण्ड निर्धारण र पिलर गाड्ने काम भए पनि सर्वोच्च अदालतको परमादेशअनुसार तालको दीर्घकालीन संरक्षण, मापदण्ड कार्यान्वयन र प्रभावित जग्गाधनीका समस्या समाधानमा देखिएको ढिलाइले राजनीतिक इच्छाशक्तिमाथि गम्भीर प्रश्न उठाएको छ।