बेनी–दरबाङ–मुना सडकमा आवतजावत जोखिमपूर्ण

सडक माथिबाट झरिरहेको सुक्खा पहिरोका कारण बेनी–दरबाङ–मुना सडकमा सवारीसाधन आवतजावत जोखिमपूर्ण बनेको छ । पहिरो नजिक पुगेपछि सवारीसाधन रोकेर पहिरो खस्ने अवस्था हेर्ने र जोखिम मोलेर पार गर्ने चालकको दैनिकी बनेको छ ।

बेनी नगरपालिका र मंगला गाउँपालिकाको सिमानामा पर्ने फापरखेत पहिरोमा पछिल्लो एक सातादेखि निरन्तर रुपमा सुक्खा पहिरो खसेको कारण यात्रा जोखिमपूर्ण बनेको छ । यसअघि सुक्खा पहिरो नखस्ने यस क्षेत्रमा पछिल्ला केही दिनयता माथिबाट ढुङ्गा माटोसहितको पहिरो खस्न थालेको छ । यात्रुबाहक बससहित दैनिक आवतजावत गर्ने सवारीसाधनका चालक र यात्रु जोखिम मोलेर यात्रा गर्न बाध्य छन् ।