हिमपात र हिमपहिरोको चेतावनीपछि मुस्ताङको पर्यटन सुस्तायो

काठमाडौं – भारी हिमपात, हिमआँधी र हिमपहिरोको जोखिमबारे चेतावनी जारी भएपछि मुस्ताङमा आन्तरिक तथा बाह्य पर्यटकको आवागमन घट्न थालेको छ । दसैँपछि दैनिक पाँच हजारभन्दा बढी पर्यटक भित्रिने गरेको मुस्ताङमा बुधबारदेखि पर्यटकको सङ्ख्या करिब आधाले घटेको जिल्ला प्रहरी कार्यालयले जनाएको छ ।

जिल्ला प्रशासन कार्यालय, लोमान्थाङ गाउँपालिका र लोघेकर दामोदरकुण्ड गाउँपालिकाले बिहीबारदेखि शनिबारसम्म मौसम प्रतिकूल रहने र हिमपात, हिमआँधी तथा हिमपहिरोको जोखिम हुन सक्ने भन्दै छुट्टाछुट्टै सार्वजनिक सूचना जारी गरेका थिए । मौसम पूर्वानुमान महाशाखाको सूचनालाई आधार मानेर प्रशासन र स्थानीय तहले सम्भावित विपद् जोखिमलाई ध्यानमा राख्दै हिमाली तथा उच्चपहाडी क्षेत्रमा पदयात्रा नगर्न पर्यटक र सर्वसाधारणलाई आग्रह गरेका छन् ।