स्याउ उत्पादनको केन्द्र जुम्लामा विकास बोर्डको मुख्यालय राख्न माग

स्याउ उत्पादनमा कर्णालीकै अग्रणी जिल्ला जुम्ला, हजारौँ किसानको पसिना र करोडौँ रुपैयाँको कारोबार यहीँबाट जोडिएको छ।

तर, यही उत्पादनलाई संस्थागत रूपमा विकास गर्न गठन गर्न लागिएको स्याउ विकास बोर्डको प्रधान कार्यालय भने कहाँ रहने भन्ने प्रश्नले अहिले बहस सिर्जना गरेको छ। स्याउ उत्पादनको प्रमुख केन्द्र जुम्लामा बोर्डको मुख्यालय स्थापना गर्नुपर्ने माग किसानले उठाइरहँदा प्रदेश सरकारको तहमा सुर्खेतमा कार्यालय राख्ने कि जुम्लामै स्थापना गर्ने भन्ने विषय पेचिलो बनेको हो। किसानको प्रश्न स्पष्ट छ। स्याउ उत्पादनको केन्द्र जुम्ला हो भने त्यसको विकास, अनुसन्धान, प्रवर्द्धन र बजारीकरण गर्ने बोर्डको मुख्यालय अन्यत्र किन?