बाराको फेटामा अस्पताल उद्घाटनको किचलो : दुई पक्षीय झडपपछि प्रहरीले गोली चलाउँदा १४ वर्षीय बालक घाइते

काठमाडौं : बाराको फेटा गाउँपालिकामा नवनिर्मित १५ शय्याको अस्पताल उद्घाटनका क्रममा विवाद चर्किदा प्रहरीले चलाएको गोली लागेर एक जना घाइते भएका छन्। शनिबार बिहान करिब साढे १० बजे पालिका समूहबीच भएको झडप नियन्त्रणमा लिन प्रहरीले हवाई फायर गर्ने क्रममा स्थानीय १४ वर्षीय आदित्य पासवान गोली लागेर घाइते भएका हुन्।

जिल्ला प्रशासन कार्यालयका अनुसार वीरगन्जस्थित नेसनल मेडिकल कलेजमा आकस्मिक शल्यक्रिया गरेर पासवानको शरीरबाट गोली निकालिएको छ। शल्यक्रिया सफल भएको र उनको अवस्था स्थिर रहेको सहायक प्रमुख जिल्ला अधिकारी छविरमण भट्टराईले जनाकारी दिए। झडपका क्रममा केही प्रहरीसमेत घाइते भएको उनले बताए।