त्रियुगा गोल्डकपमा सहलेशको विजयी सुरुआत

त्रियुगा अन्तर्राष्ट्रिय आमन्त्रण गोल्डकप फुटबल प्रतियोगिताको उद्घाटन खेलमा सहलेश फुटबल क्लब सिराहाले आयोजक गाईघाट फुटबल क्लबलाई २–१ गोलले पराजित गरेको छ।

उदयपुरको थरुहट रंगशालामा शनिबार भएको खेलमा गाईघाटका अर्जुन रानाले २८औँ मिनेटमा गोल गर्दै घरेलु टोलीलाई अग्रता दिलाएका थिए। तर, खेलको अन्तिम समयमा सहलेशका विज्ञान खड्का र आदित्य शाक्यले लगातार गोल गर्दै टोलीलाई जित दिलाए। खड्काले ७२औँ मिनेटमा हेडमार्फत बराबरी गोल गरे भने त्यसको छ मिनेटपछि शाक्यले निर्णायक गोल गरे।