इजरायलमा अरब दललाई समेटेर सरकार बनाउन माग गर्दै हजारौँको प्रदर्शन

काठमाडौं – इजरायलमा अरब राजनीतिक दललाई समेत सहभागी गराएर नयाँ सरकार गठन गर्नुपर्ने माग गर्दै हजारौँ मानिस सडकमा उत्रिएका छन् । शनिबार साँझ तेल अभिभसहित देशका विभिन्न सहरमा प्रदर्शन गर्दै उनीहरूले यहूदी र अरब समुदायबीच सहकार्य, समानता र शान्तिको पक्षमा आवाज उठाएका हुन् ।

तेल अभिभको हबिमा स्क्वायरमा करिब दुई हजार प्रदर्शनकारी भेला भएका थिए । उनीहरूले ‘साझेदारी र समानताबाट सरकार परिवर्तन गर्छौं’ र ‘परिवर्तनका लागि बहुमत छ’ लेखिएका प्लेकार्ड बोकेका थिए । प्रदर्शनकारीले अरब दललाई समेटेर नयाँ सरकार गठन गर्नुपर्ने माग गरेका थिए ।