चीन व्यापारको नयाँ अध्याय: कोरला नाकाको सम्भावना र पूर्वाधारको चुनौती

काठमाडौँ । नेपाल-चीन उत्तरी सीमापार व्यापारको परम्परागत नक्सा इतिहासकै ठूलो परिर्वतनको मोडमा पुगेको छ। वर्षौंदेखि तातोपानी र रसुवागढी नाकाका साँघुरा सडक, निरन्तरको पहिरो र रसुवाको भोटेकोशीमा आएको विनाशकारी बाढीको सास्ती झेलिरहेका व्यापारीहरूका लागि मुस्ताङस्थित कोरला नाका वैकल्पिक व्यापारिक केन्द्रका रूपमा उदाएको छ।

अघिल्लो वर्षको भदौ ३१ गतेदेखि मात्रै पूर्ण रूपमा सञ्चालनमा आएको कोरला नाकाले चालु आर्थिक वर्ष २०८३/८४ को साढे तीन महिनामै जुन व्यापारिक फड्को मारेको छ, त्यसले नेपालको उत्तरी व्यापार संरचनामा ठूलो रणनीतिक हेरफेरको सङ्केत गरेको छ।