स्पेनिस फुटबलको स्वर्णिम युग

विश्व फुटबलको नक्सामा अहिले एउटा देशको नाम लगातार रूपमा गुञ्जिरहेको छ, त्यो हो स्पेन । हरियो मैदानमा देखाइने जादु, पासिङ गेमको अद्भूत कला ‘टिकी–टाका’ र जितप्रतिको कहिल्यै ननिभ्ने भोकले आज स्पेनलाई विश्व फुटबलको निर्विवाद सम्राट बनाइदिएको छ । हिजोका दिनमा एउटा सुन्दर शैली भएको तर उपाधिको नजिक पुगेर चुक्ने टिमको रूपमा चिनिने स्पेनले आज आफ्नो भाग्य र भविष्य दुवैलाई आफैंले कोरेको छ ।

पछिल्लो केही समययता अन्तर्राष्ट्रिय फुटबलका हरेक मञ्चमा स्पेनिस खेलाडीहरूको दबदबा यस्तो छ कि, विश्व फुटबलका ठूला हस्तीहरू समेत उनीहरूका सामु नतमस्तक बन्न बाध्य भएका छन् । यो केवल केही खेल जित्नु मात्र होइन, एउटा राष्ट्रको खेलप्रतिको समर्पण, दीर्घकालीन सोच र अटुट मेहनतको जीवन्त दस्तावेज पनि हो ।