महेन्द्रनगरमा दुई आकाशे पुल निर्माण सम्पन्न, तेस्रो मङ्सिरभित्र सकिने

काठमाडौं – जनकपुरधाम–ढल्केवर छ लेन व्यापारिक सडकअन्तर्गत धनुषाको क्षीरेश्वरनाथ नगरपालिका–५ महेन्द्रनगर बजारमा निर्माणाधीन दुई वटा आकाशे पुलको निर्माण सम्पन्न भएको छ । पुलमा रङरोगन तथा सौन्दर्यीकरणको काम भइरहेको र चाँडै सर्वसाधारणका लागि सञ्चालनमा ल्याउने तयारी गरिएको छ ।

मधेस प्रदेशमा पहिलो पटक निर्माण गरिएका यी आकाशे पुलले व्यस्त सडकमा पैदल यात्रुको आवागमन सुरक्षित र सहज बनाउने अपेक्षा गरिएको छ । सडक डिभिजन कार्यालय मुजेलिया, जनकपुरधामका अनुसार पैदल यात्रुको चाप बढी हुने महिला विकास चोक र सखुवा चोकमा दुई तथा लक्ष्मीनिया गाउँपालिकामा एउटा गरी तीन वटा पुल निर्माण थालिएको हो ।