पुराना दलमा पहिरो, श्रम संस्कृतिमा नेताको ओइरो!

काठमाडौँ- झन्डै चार दशक नेकपा एमालेमा बिताएका इलामका उमेश गुरुङले केही दिनअघि सामाजिक सञ्जालमा लामो स्टाटस लेख्दै पार्टी परित्यागको घोषणा गरे। एमाले इलामका पूर्वसचिव गुरुङले पार्टीमा आबद्ध रहेकोमा ‘हीनताबोध’ भएको उल्लेख गर्दै अलग हुने निर्णय सुनाएका हुन्। उनले आफ्नो स्टाटसमा जिल्लादेखि राष्ट्रिय तहसम्मका एमाले नेताहरू र पार्टीका नाममा भएका विकास निर्माणका कामसमेत सम्झिएका छन्।

एमाले परित्याग गरेलगत्तै उनी श्रम संस्कृति पार्टीमा आबद्ध भए। पूर्वपत्रकारसमेत रहेका गुरुङलाई संगत गर्नेहरू स्पष्टवक्ताका रूपमा चिन्छन्। उनको यही छविका कारण स्थानीयस्तरमा राम्रो प्रभाव छ।