छाता र वर्षादी ओत अनि पारिलो घामसंगै काठमाडौं फिल्म फेस्टिभल

लगातारको झरीले जनजीवन प्रभावित भइरहे पनि काठमाडौं फिल्म फेस्टिभल २०८३ मा भने दर्शक र फिल्मकर्मीको उत्साह उस्तै देखियो। लगातारको झरीका बीच देश र विदेशका सहभागीहरू छाता र वर्षादी ओढेरै कार्यक्रमको शुभारम्भ र दोस्रो दिनको कार्यक्रममा उपस्थित भएका थिए। प्रतिकूल मौसमका बाबजुद अन्तर्राष्ट्रिय फिल्मकर्मी तथा नेपाली कलाकारको उपस्थितिले शुभारम्भ समारोहलाई उत्सवमय बनाएको थियो।

काठमाडौँ महानगरपालिकाको आयोजनामा राजधानीमा सम्पन्न तीनदिने महोत्सवको शुक्रबार वसन्तपुरमा आयोजित समारोहबीच महानगरपालिकाकी कार्यवाहक मेयर सुनिता डंगोल, भारतीय अभिनेत्री शबाना आजमी तथा ख्यातिप्राप्त हास्य जोडी मदनकृष्ण श्रेष्ठ र हरिवंश आचार्यलगायतले संयुक्त रूपमा शुभारम्भ गरेका थिए। समारोहमा विभिन्न परम्परागत नृत्य तथा झाँकी प्रस्तुत गरिएको थियो। महोत्सवमा नेपाली फिल्म क्षेत्रका विभिन्न पेशाकर्मी तथा कलाकारसंगै भारतीय अभिनेत्री शबाना आजमी, जापानी निर्देशक ताकायुकी नाकामुरा, भारतीय फिल्म प्रोग्रामर दीप्ति डीकुन्हा, सांघाई फिल्म एकेडेमीका प्राध्यापक मार्को मुलरलगायत अन्तर्राष्ट्रिय फिल्म क्षेत्रका व्यक्तित्व सहभागी थिए। फिल्म प्रदर्शनमा मात्र सीमित नरही अन्तरसंवाद, मास्टर क्लास, रेड कार्पेट र पुरस्कार वितरणसमेत समेटिएको महोत्सवले नेपाली तथा विदेशी फिल्मकर्मी, निर्देशक, विद्यार्थी र रचनात्मक क्षेत्रका व्यक्तित्वलाई एउटै मञ्चमा जोडेको छ।