स्थानीयको श्रमदानबाट पाउद्वार–खोप्रा पदमार्ग सञ्चालनमा

काठमाडौं – गत असोजमा परेको भीषण वर्षापछि पहिरोले अवरुद्ध बनेको म्याग्दीको अन्नपूर्ण गाउँपालिका–५ स्थित पाउद्वार गाउँदेखि खोप्रा जोड्ने पदमार्ग स्थानीयवासीको श्रमदानबाट मर्मत गरी सञ्चालनमा ल्याइएको छ । पाउद्वारका बासिन्दाले पहिरो पन्छाउनुका साथै नयाँ बाटो निर्माण गरेर पाउद्वार–खोप्रा–खयर पदमार्गको पाउद्वार–हिलडाँडा–लरेनी खण्ड खुलाएका हुन् ।

पाउद्वार पर्यटन सहकारी संस्थाका सचिव हरि तिलिजा पुनका अनुसार स्थानीयवासीले श्रमदान गरेर पदमार्ग मर्मत गरेपछि आवतजावत सहज भएको छ । दुई सय घरपरिवार रहेको पाउद्वारका बासिन्दा पहिरोबाट क्षति पुगेको पदमार्ग, विद्युत् र खानेपानी आयोजना मर्मतका लागि एक महिनादेखि श्रमदान अभियानमा जुटेका छन् ।