घर रित्तिएको, सुविधा भित्रिएको थातथलो

दसैँ–तिहार आउँदा गाउँका घरआँगनमा चहलपहल बढ्न थाल्छ । रोजगारी र अवसरको खोजीमा विदेश तथा सहर पुगेका युवा गाउँघर फर्किन्छन् । लामो समयदेखि सुनसान रहेका गाउँघरमा हाँसो गुञ्जिन्छ, परिवारका सदस्य भेला हुन्छन् र गाउँ केही दिनका लागि फेरि जीवन्त बन्छ । चाडपर्व सकिएसँगै दृश्य फेरिन्छ । युवा आफ्नो कर्मथलो फर्किन्छन्, विमानस्थलमा विदेश जानेको लाम लाग्छ र गाउँका घरआँगन फेरि सुनसान हुन थाल्छन् ।

यो दृश्य कुनै एउटा गाउँको मात्र होइन, नेपालको साझा यथार्थ बन्दै गएको छ । प्रश्न युवा विदेश जानुमा मात्र होइन, उनीहरू किन जान बाध्य भइरहेका छन् भन्नेमा छ । अवसरको खोजीमा विदेश जानु स्वाभाविक हो । तर स्वदेशमै सम्भावना नदेखेर विदेशिनुपर्ने अवस्था गम्भीर चिन्ताको विषय हो ।