माटोभित्रको जीवन–दर्शन

माटो स्वस्थ रहेमात्र कृषि, प्रकृति र मानव सभ्यताको निरन्तरता सुरक्षित रहन्छ। माटोलाई जोगाउनु भनेको आफ्नो जीवन जोगाउनु हो, माटोलाई सम्मान गर्नु भनेको आफ्नै अस्तित्वलाई सम्मान गर्नु हो।

गाउँको पुरानो घर पुग्दा वृद्ध किसान खेतको डिलमा बसेर माटो हातमा माडिरहेका थिए। जीवनका धेरै वसन्त र शिशिर देखिसकेका उनका हातमै उमेरका रेखा प्रस्ट देखिन्थे। जीवनको ठूलो हिस्सा उनले त्यही माटोमा बिताएका थिए। त्यही माटोले उनको परिवार पालेको थियो, छोराछोरी हुर्काएको थियो र जीवनका अनेक सुखदुःखमा साथ दिएको थियो।