एसिया कप खेल्न नेपाली यू–१९ टोली पोखराबाटै ओमान प्रस्थान

एसीसी पुरुष यू–१९ एसिया कप २०२६ मा सहभागी हुन नेपाली राष्ट्रिय यू–१९ क्रिकेट टोली पोखराबाटै ओमान प्रस्थान गरेको छ। कात्तिक १९ देखि २८ गतेसम्म ओमानमा आयोजना हुने प्रतियोगिताका लागि १५ सदस्यीय टोली सोमबार फ्लाई दुबईको विमानमार्फत दुबई हुँदै ओमान उडेको हो।

टोलीलाई पोखरा अन्तर्राष्ट्रिय विमानस्थलमा गण्डकी प्रदेश क्रिकेट संघ र कास्की जिल्ला क्रिकेट संघका पदाधिकारी तथा शुभेच्छुकले बिदाइ गरेका थिए। पोखरा महानगरपालिकाका प्रमुख धनराज आचार्यसहितको उपस्थितिमा टोलीलाई औपचारिक कार्यक्रम गरी बिदाइ गरिएको थियो।