कर्मचारी तर्साएर कसरी आउँछ सुशासन ?

राज्यको सफलता राजनीतिक नेतृत्वको इच्छाशक्ति र सरकारले घोषणा गर्ने नीतिमा मात्र निर्भर हुँदैन । ती नीति संविधान र कानुनअनुसार कार्यान्वयन गर्ने, नागरिकसम्म सेवा पु¥याउने र राज्यका दैनिक कामकाज निरन्तर सञ्चालन गर्ने प्रशासनको क्षमता पनि उत्तिकै महत्वपूर्ण हुन्छ । राजनीतिक नेतृत्व परिवर्तन भइरहन्छ र सरकारका प्राथमिकता फेरिन सक्छन्, तर राज्यका नियमित कामकाजलाई निरन्तरता दिने स्थायी संयन्त्र प्रशासन नै हो । त्यसैले प्रशासन कमजोर हुँदा राज्यको सेवा प्रवाह, विकास निर्माण, नियमन र नागरिकको विश्वाससमेत कमजोर हुन सक्छ ।

तर, प्रशासन राज्य सञ्चालनको मेरुदण्ड हो भन्दैमा त्यसलाई प्रश्नभन्दा माथि राख्न मिल्दैन । सार्वजनिक पदमा बसेका कर्मचारी कानुन, नैतिकता र नागरिकप्रतिको उत्तरदायित्वबाट निर्देशित हुनुपर्छ । भ्रष्टाचार, अनियमितता वा जिम्मेवारीबाट पन्छिने प्रवृत्तिलाई संरक्षण गर्नु प्रशासनको बचाउ होइन । त्यस्तै, कर्मचारीलाई निरन्तर शङ्का, आरोप, अनुचित दबाब र कारबाहीको भयमा राखेर उत्कृष्ट कार्यसम्पादनको अपेक्षा गर्नु पनि व्यावहारिक हुँदैन ।