भाइटीका कि तिहार टीका?

तिहार नजिकिँदै छ, घरहरू सफा हुँदैछन्, बजारमा सप्तरङ्गी टीका र मखमली फूल देखिन थालेका छन्। सबैको मनमा चाडपर्वको रमाइलो छ। तर तिहारसँगै मेरी आमालाई एउटा पुरानो प्रश्न फेरि पनि दोहोरिनेछ- तिहारमा टीका लगाउनकै लागि भए पनि एउटा भाइ चाहिँ चाहियो नि, एउटा छोरो पाइदेऊ न।

मेरी आमाले विगतका वर्षहरूमा जस्तै यसपालि पनि यस्ता कुरा सुन्नुपर्नेछ। उहाँको मनमा कति कुरा खेल्छन्, त्यो त उहाँलाई नै थाहा होला। तर बाहिर भने मुस्कुराउँदै भन्नुहुन्छ, ‘हुन्छ नि, भोलि बिहानै पाइदिन्छु।’ अनि खिस्स हाँस्दै आफ्नो बाटो लाग्नुहुन्छ। सायद उहाँ यस्ता प्रश्नको जवाफ दिँदादिँदै थाकिसक्नुभएको छ।