फूलखेतीले फेरिँदै धनगढीका किसानको आर्थिक अवस्था

धनगढी । प्लास्टिकका फूलको प्रयोग घट्दै र प्राकृतिक फूलको माग बढ्दै गएपछि कैलालीको धनगढीमा व्यावसायिक फूलखेती गर्ने किसानको संख्या बढ्न थालेको छ । घरायसी प्रयोजन र पूजाआजाका लागि सीमित खेती गर्दै आएका किसान अहिले फूलखेतीलाई आम्दानीको भरपर्दो स्रोत बनाउन थालेका छन् । बिघौँ जमिनमा सयपत्रीसहित विभिन्न प्रजातिका फूल उत्पादन गरेर किसानले राम्रो आम्दानी गर्न थालेका छन् ।

स्थानीय बजारमा प्राकृतिक फूलको माग बढ्नु, उत्पादित फूलले बजार पाउन थाल्नु र स्थानीय सरकारले तालिम तथा अनुदान उपलब्ध गराउन थालेपछि किसानको आकर्षण फूलखेतीतर्फ बढेको हो ।