साइबर सुरक्षा जोखिमपछि नयाँ ई-जीपी प्रणाली सञ्चालनमा

काठमाडौं । साइबर सुरक्षाको जोखिम देखिएपछि झन्डै दुई महिनादेखि प्रभावित बनेको सार्वजनिक खरिद प्रक्रिया नयाँ विद्युतीय प्रणालीमार्फत पुन: सञ्चालनमा आएको छ । सार्वजनिक खरिद अनुगमन कार्यालयले नयाँ संस्करणको विद्युतीय खरिद प्रणाली (ई-जीपी) कार्यान्वयनमा ल्याउँदै अब निर्माण कार्य तथा मालसामान खरिदका सबै राष्ट्रिय र अन्तर्राष्ट्रिय बोलपत्र नयाँ प्रणालीबाट मात्रै प्रकाशन गर्न सार्वजनिक निकायलाई निर्देशन दिएको छ ।

कार्यालयले कात्तिक १७ गते सूचना जारी गर्दै नयाँ प्रणाली प्रयोगमा ल्याइएको जानकारी दिएको हो । यसअघि प्रयोग हुँदै आएको ई-जीपी प्रणालीमा उच्च सुरक्षा जोखिम देखिएपछि भदौ ११ गतेदेखि नयाँ बोलपत्रसम्बन्धी सूचना प्रकाशनमा रोक लगाइएको थियो ।