पाँच फार्मबाट च्याउखेती, वार्षिक दुई लाख आम्दानी गर्दै पार्वती

काठमाडौं – श्रीमान् गुमाएपछि परिवारको आर्थिक जिम्मेवारी आफैँले सम्हाल्नुपर्ने अवस्था आयो। अरूसँग पैसा माग्नुपर्ने बाध्यताले आत्मनिर्भर बन्ने सोच जन्मायो । त्यही सोचलाई कर्ममा बदल्दै भीमदत्त नगरपालिका–६ वनगाउँकी पार्वती थापाले व्यावसायिक च्याउखेतीबाट आफ्नो जीवनको बाटो बदलेकी छिन् ।

विसं २०६९ मा श्रीमान् गुमाएपछि आत्मनिर्भर बन्ने उद्देश्यले च्याउखेती सुरु गर्नुभएकी थापा अहिले पाँचवटा फार्म सञ्चालन गर्दै वर्षभरि उत्पादनमा सक्रिय हुनुहुन्छ। सामान्य जानकारीका आधारमा सुरु भएको उहाँको व्यवसाय अहिले परिवारको आम्दानीको भरपर्दो स्रोत बनेको छ ।