बारीभरि सयपत्री फुल्यो, तिहारअघि नै बिक्री नहुने हो कि भन्ने चिन्ता

काठमाडौं – तनहुँको म्याग्दे गाउँपालिका–४ छिम्लीश्वाराका बारी यतिबेला सयपत्री फूलले पहेँलपुर बनेका छन् । बारीभरि ढकमक्क फुलेका फूलले वातावरण सुन्दर देखिए पनि किसानको मनमा भने बजारको चिन्ता बढेको छ । तिहारलाई लक्षित गरेर लगाइएको फूल दसैँलगत्तै फक्रिएपछि तिहारसम्म बिक्री गर्न सकिने हो कि होइन भन्ने अन्योल किसानमा देखिएको छ ।

तिहारमा सयपत्री फूलको माग उच्च हुने भएकाले किसानले यसै समयलाई लक्षित गरेर खेती गरेका थिए । तर, यस वर्ष तिहार ढिलो परेकाले फूल अपेक्षाभन्दा अगाडि नै फुलेको हो । फूल छिटो फक्रिएपछि तिहारसम्म ताजा राख्न र उचित मूल्यमा बिक्री गर्न सकिनेमा किसान विश्वस्त हुन सकेका छैनन् ।