करोडौंको पिली भ्युटावर प्रयोगविहीन

कर्णाली राजमार्गमै पर्ने पिली डाँडामा अग्लो र गोलाकार भवन छ। त्यो हो-पिली भ्युटावर। कालीकोटको खाँडाचक्र नगरपालिका -७ पिलीमा ६ करोड बढी लागतमा निर्माण गरिएको पिली भ्युटावर अहिले बेवारिसे बनेको छ। दुई वर्षअघि निर्माण गरिएको पिली भ्युटावरको प्रयोग रेखदेख एवं सञ्चालन गर्ने स्थानीय तहलाई डिभिजन वन कार्यालय कालीकोटले हस्तान्तरण नगर्दा बेवारिसे अवस्थामा पुगेको हो।

टावरका स्टिलका बार, सिसा चोरी हुन थालेका छन्। टावर बनेपछि पर्यटकीय गतिविधि बढ्ने र स्थानीयको आयआर्जनमा वृद्धि हुने आशामा रहेका स्थानीय ललित मल्ल भ्युटावर बनेको तीन वर्ष हुँदासम्म पनि सञ्चालनमा नआउँदा भ्युटावरको करोडौं लगानी खेर जानेमा चिन्तित छन्। युद्ध संग्रहालयको अवधारणामा निर्मित यो भ्युटावरमा एउटा गेट, तीनवटा प्रतीक्षालय, दुईवटा चौतारा, फाउन्टेनसहितको एउटा पानीपोखरी, एउटा टिकट काउन्टर र शौचालयजस्ता कंक्रिट संरचना छन्।