‘पहिला हिमाल देख्दा गौरव लाग्थ्यो, आजकल खतरा महसुस हुन्छ’

मेरो नाम छेतेन ग्याल्पो हो। म रसुवाको स्याफ्रुबेंसीको स्थानीय बासिन्दा हुँ र रसुवा चेम्बर अफ कमर्समा पनि आबद्ध छु । सँगसँगै, नाका क्षेत्रमा व्यापार व्यवसायको काम पनि गर्दै आएको छु । मेरो बाल्यकाल काठमाडौँमै बित्यो र स्नातक तहको अध्ययन सकिएपछि, आफ्नै ठाउँमा केही गर्नुपर्छ र आफ्नै ठाउँ नै सबै कुराले सम्पन्न छ भन्ने सोचेर स्याफ्रुबेसी फर्किएँ । हाम्रो ठाउँ आर्थिक रूपमा र व्यापारिक दृष्टिकोणले निकै सुगम छ, जहाँ बाहिर भौतारिनु पर्दैन, व्यवसाय गर्ने आफ्नै उपयुक्त वातावरण छ ।

हामी त तल्लो तहमा बस्ने, हिमाल नचढेको र हिमाल नजिकै पुगेको पनि नभएको मान्छे हौँ । पहिला-पहिला हिमाल देख्दा अपार खुसी र गर्व लाग्थ्यो, तर अहिले आएर यही हिमाल नै निकै खतरनाक बन्दै गएको महसुस हुन थालेको छ । यस पटकको पहिरोले मेरा परिवारका छ जना सदस्यलाई लग्यो र पाँचवटा घर सखाप पार्‍यो । मेरो आर्थिक र वित्तीय आधार नै त्यहीँ थियो, किनकि हामीले बाहिर अन्यत्र लगानी गरेका थिएनौँ, आफ्नै ठाउँमा केही गर्नुपर्छ भन्ने हाम्रो सोच थियो।