जिउँदो सहिद डा. गोविन्द केसी: स्वास्थ्य शिक्षा र सेवा सुधारका निरन्तर प्रयासरत सत्याग्रही

यो कस्तो विडम्बनापूर्ण! एक सन्त, निर्लोभ र इमान्दार चिकित्सकले देश र समाजका लागि पटकपटक ज्यानको बाजी लगाउनुपर्छ। दुई-चार पटक होइन, यो २५औँ सत्याग्रह हो, र २५औँ सत्याग्रहको पनि ७ औँ दिन बितिसक्यो। वास्तवमा यस्ता मुद्दाहरूको पैरवी गर्ने र स्थापित गर्ने काम राज्यकै हो, अझ भन्नुपर्दा देश र जनताको कल्याण गर्छौँ भन्ने राजनीतिककर्मीको हो। तर यहाँ त उल्टो भइरहेको छ।

राजनीतिक नेतृत्व र सरकारले चिकित्सा शिक्षा र स्वास्थ्यको गुणस्तर खस्काउने निर्णय गर्ने र त्यसलाई रोक्न डाक्टर केसी ज्यानै जोखिममा राखेर लड्ने स्थिति छ। यो सिलसिला आजमात्र भएको होइन, करिब २०६८ सालतिर नै सुरु भएको हो। त्यो बेला संविधान बनेको थिएन, २०७२ मा संविधान बन्यो, त्यसपछि सरकारहरू आए। तर चिकित्सा शिक्षामा बेथिति र गलत प्रहार रोकिएन, उहाँको सत्याग्रह जारी रह्यो। र फेरि जेनजी आन्दोलनपछि बनेको युवाहरूको सरकार बनेपछि पनि बयोवृद्ध डा. केसी पटकपटक संघर्षमा उत्रिनुपर्ने बाध्यता विडम्बनापूर्ण छ।