धन्वन्तरी जयन्ती : धनभन्दा ठूलो आरोग्यको शास्त्रीय महत्त्व

अथर्ववेदसँग सम्बद्ध उपवेदका रूपमा आयुर्वेदलाई उल्लेख गरिएको छ। आयुर्वेद मानव स्वास्थ्य, रोगको निदान, उपचार, औषधि विज्ञान तथा दीर्घजीवनसँग सम्बन्धित ज्ञानविज्ञानको समष्टिगत शास्त्र हो। यसको मूल उद्देश्य मानव जीवनलाई स्वस्थ, निरोगी र दीर्घजीवी बनाउनु हो। चिकित्सा क्षेत्र, विशेषतः शल्यचिकित्साको क्षेत्रमा भारतीय संस्कृतिका प्रारम्भिक तथा विशिष्ट अगुवामध्ये एक धन्वन्तरि हुन्।

पौराणिक मान्यताअनुसार देवता र असुरबीच भएको समुद्रमन्थनका क्रममा कालकूट विष, विभिन्न रत्न, दिव्य औषधि तथा अमृत प्रकट भएका थिए। सोही समुद्रमन्थनबाट भगवान् विष्णुको अंशावतारका रूपमा भगवान् धन्वन्तरी अमृतकलश धारण गरी प्रकट भएको प्रसङ्ग पुराणहरूमा वर्णित छ।