सयपत्री र मखमलीको पर्वमा गोदावरीको सुगन्ध, फूलसँगै फुल्दै व्यावसायिक सपना

इलाम । तिहार आउन थालेपछि नेपालीका घर आँगन फूलले सजिन थाल्छन् । सयपत्रीका पहेँला र सुन्तला रङ, मखमलीको गाढा सौन्दर्य अनि फूल मालामा गाँसिएको धागोले गाउँदेखि सहरसम्म पर्वको रौनक थप्छ । दाजुभाइ र दिदीबहिनीबिचको स्नेह, लक्ष्मीपूजाको उज्यालो र देउसी भैलोको सांस्कृतिक उल्लाससँग फूलको सम्बन्ध अभिन्न रूपमा जोडिएको छ ।

यही फूलको उत्सवमा यस वर्ष इलामले नयाँ रङको मेला लगाइरहेको छ । तिहारको उल्लाससँगै गोदावरी फूलको सौन्दर्य, स्थानीय उत्पादन र पुष्प व्यवसायको सम्भावना उजागर गर्ने उद्देश्यले इलाममा पहिलो पटक ‘प्रथम गोदावरी प्रदर्शनी मेला–२०८३’ आयोजना भएको छ । फ्लोर कल्चर एसोसिएसन नेपाल, इलामले कात्तिक १८ देखि २१ गतेसम्म इलाम नगरपालिका–७ स्थित चोक बजार नजिकै चार दिने प्रदर्शनी मेला सञ्चालन गरेको हो ।