बाँझो जमिनमा ढकमक्क फूल

तानसेन : बाँझो, प्रयोगविहीन जमिनलाई सदुपयोग गर्दै कृषि व्यवसायबाट राम्रो आम्दानी गर्न सकिन्छ भन्ने उदाहरण पाल्पाको रैनादेवी छहरा गाउँपालिका–२ का आमा इन्दिरा र छोरा खिमराज कोइरालाले प्रस्तुत गरेका छन्। उनीहरूले चार रोपनी बाँझो जमिनमा व्यावसायिक फूल खेती सुरु गरेर यस वर्षको तिहार तथा दीपावलीको मौसममा करिब ६ लाख रुपैयाँ आम्दानी गर्ने लक्ष्य राखेका छन्।

रैनादेवी छहरा गाउँपालिका–२ मा रहेको धर्तीमाता कृषि फार्ममार्फत कोइराला परिवारले फूल खेतीलाई व्यावसायिक रूपमा अगाडि बढाएका हुन्। उनीहरूले विशेषगरी तिहार र दीपावलीलाई लक्षित गरी टेनिस बल जातको फूल खेती गरेका छन्। चाडपर्वमा फूल तथा मालाको माग बढी हुने भएकाले सोही समयलाई लक्षित गरेर उत्पादन र बजारीकरणको योजना बनाइएको सञ्चालक खिमराजले बताए।