पोल्यान्डमा अन्धाधुन्ध गोली चल्दा ६ जनाको मृत्यु

काठमाडौँ — पोल्यान्डको ऐतिहासिक तथा दोस्रो ठूलो सहर क्राकोमा एक व्यक्तिले अन्धाधुन्ध गोली चलाउँदा कम्तीमा ६ जनाको मृत्यु भएको छ भने १५ जना घाइते भएका छन्। शनिबार दिउँसो मुख्य बजार क्षेत्रमा भएको घटनामा चार महिला र दुई पुरुषको ज्यान गएको हो। घाइतेहरूमध्ये पाँच जना विदेशी नागरिक रहेको पोलिस अधिकारीहरूले पुष्टि गरेका छन्।

कारबाट अन्धाधुन्ध गोली प्रहार गर्दै हिँडेका आक्रमणकारीलाई प्रहरीले गोली चलाएर घाइते अवस्थामा नियन्त्रणमा लिएको छ। संदिग्ध पोल्यान्डकै नागरिक हुन् र उनको कारबाट थप हतियार तथा ठूलो परिमाणमा गोलीगट्ठा बरामद गरिएको छ। घटनालगत्तै ओस्त्रोवियेत्स स्विएन्तोक्रिस्कीस्थित संदिग्धको घरमा खानतलासी गर्दा दुई महिला र एक पुरुष गरी थप तीन जनाको शव भेटिएको प्रधानमन्त्री डोनाल्ड टस्कले जानकारी दिएका छन्। उक्त तीन जना संदिग्धका परिवारका सदस्य हुन सक्ने अनुमान गरिएको छ।