लक्ष्मीपूजामा विद्युत् माग १,७०० मेगावाट

काठमाडौँ — नेपाल विद्युत् प्राधिकरणले यस वर्षको लक्ष्मीपूजाको समयमा देशभित्र विद्युत्को उच्चतम माग (पिक डिमान्ड) करिब १ हजार ७०० मेगावाट पुग्ने अनुमान गरेको छ। माग उच्च हुने यस पर्वमा लोड व्यवस्थापन गरी उपभोक्तालाई भरपर्दो र निरन्तर विद्युत् आपूर्ति सुनिश्चित गर्न प्राधिकरणले विशेष तयारी पूरा गरेको छ।

प्राधिकरणका कार्यकारी निर्देशक दीर्घायु कुमार श्रेष्ठका अनुसार लक्ष्मीपूजाको समयमा प्रणालीमा करिब २ हजार ५०० मेगावाट विद्युत् उत्पादन हुने प्रक्षेपण छ। कुल मागभन्दा आन्तरिक उत्पादन बढी रहेकाले बाह्य आयात बिना नै आन्तरिक उत्पादनले माग सहजै धान्ने उनले स्पष्ट पारेका छन्।