भाइटीकाको खुसी पीडाको आँसुले पुछेर हातमुख जोड्न आधार खोज्न भारत लागे सिंजाबासी

जुम्लाको सिंजा गाउँपालिका–५ की जर्मकली बुढाले यस वर्षको भाइटीकाका लागि बारीभरि फुलेका स्थानीय फूल जोगाएर राखेकी थिइन्। चार दिदीबहिनीकी एक्ला दाजु मुनबहादुर बुढालाई सप्तरङ्गी टीका लगाइदिने र फूलको माला पहिर्‍याउने उनको ठूलो धोको थियो। तर, तिहारको मुखैमा दाजु मजदुरीका लागि भारत गएपछि उनको त्यो रहर अधुरै बनेको छ।

कात्तिक २५ गते बिहान ११ बजेर ७ मिनेटमा भाइटीकाको शुभसाइत छ। दिदीबहिनी टीका र माला तयार पार्ने प्रतीक्षामा छन्। तर, जर्मकलीका दाजु भने बिहीबार बिहानै रोजगारीको खोजीमा सीमापारि पुगिसकेका छन्। दिदीबहिनीबाट टीका नलगाउनु उनको रहर होइन, परिवारको जीविकोपार्जन गर्नुपर्ने बाध्यता हो।