दैलेख घटना: हतियार प्रहारबाट गम्भीर घाइते भएकी महिलाको मृत्यु

दैलेखको ठाँटीकाँध गाउँपालिकामा छिमेकीको घरमा पसेर हँसिया प्रहार गर्दा गम्भीर घाइते भएकी एक जनाको मृत्यु भएको छ। घटनामा घाइते भएका अन्य चार जनालाई हेलिकोप्टरमार्फत सुर्खेत लगिएको छ।

जिल्ला प्रहरी कार्यालय दैलेखका प्रमुख प्रहरी नायब उपरीक्षक (डिएसपी) श्रवनकुमार विकका अनुसार ठाँटीकाँध गाउँपालिका–४ धनकोटका ३७ वर्षीय बमबहादुर रावतले आइतबार बिहान करिब ५ बजेतिर छिमेकी चन्द्रबहादुर पुन मगरको घरमा पसेर परिवारका सदस्यमाथि अन्धाधुन्ध हँसिया प्रहार गरेका थिए।